Presidenti i ri nacionalist i Serbisë në më pak se një javë që kur mori detyrën, e ka goditur stabilitetin e brishtë të Ballkanit dhe ka vënë hije mbi politikat e tij të proklamuara pro-evropiane, shkruan në një analizë, agjencia e lajmeve, Associated Press.
Kjo agjenci, thotë se ish aleati ultranacionalist i Slobodan Milosheviqit gjatë kohës së luftës, ka ngjallur tensione në rajonin e trazuar duke deklaruar se masakra e Srebrenicës ku serbët e Bosnjes vranë 8 mijë burra dhe djem myslimanë, nuk ishte gjenocid, por një "krim i rëndë".
Agjencia e lajmeve sjell në kujtesë edhe deklaratën tjetër të Nikoliqit se "Vukovari është qytet serb".
Këto deklarata kujtojnë epokën e luftës së viteve të '90-ta kur Milosheviqi nisi luftërat në Kroaci e Bosnje për të krijuar një shtet pan-serb pas shpërbërjes së Jugosllavisë, thuhet në analizë.
AP vëren se gjatë fushatës zgjedhore, Nikoliq ka thënë se nga një ekstremist i krahut të djathtë është kthyer në një populist konservator që mbështet integrimin e Serbisë në BE.
Por, ringjallja e nacionalizmit, shkruan AP, ka lëshuar alarmin në rajon dhe mund ta nxjerrë nga binarët ofertën për anëtarësim të Serbisë në BE.
Gjatë inaugurimit të tij, Nikoliq u zotua për raporte të mira me Kroacinë e Bosnjen, por, përsëriti se Serbia duhet të braktisë ambiciet e anëtarësimit në BE, po që se i duhet të heqë dorë nga Kosova. (KD/INA)
No comments:
Post a Comment